عن صباح الخير ال ما رجعْ

غريبْ عن قلبي

عن اونةِ انرسمت بحبكْ         

وتقدّستْ بغار وضحكاتْ      

               من لون عيونكْ وكلماتِك الأحلى من ترتيلْ

                               الأحلى من غنيّة عشقْ وهوا

             .   .   .

غريبْ

غريبْ عن وقتي ال صار

              من بعدكْ

        كأنّو مََّي مافيها حَياة

غريبْ عن لساني ال ماعادْ

                         يعرف درب الهوا

                        ولا طعمة لسانكْ

                        ولا كلّ ميلي بجسمكْ

                        ولا عرق بينضح بعد كل تعب وشهوة

   لساني ال بيطيبكْ من الهمّ

                          وتقلْ الحياة

             .   .   .

غريبْ

 عن رغيفْ الخبز وحبةْ الزيتونْ

        عن كاسْ الخمرْ

        عن مشوار ندوّر العالمْ

         مشّانْ تاسومةِ وبكلةْ شعرْ

غريبْ عن ريحة الّورق ال بكتبو

          قَصايد وكلماتْ سحرْ

غريبْ عن مرايتي ال صارْ

كلّ ما شفتْ حالي فيها . . .

       سألتني

وَين تركتْ الوجه الحنون وطيبْ القلبْ

       وَين شامةْ الحسنْ وضحكة الجنةِ

       وَين تركتْ ال كان عمرها ماتفارقكْ

      قلبها عاقلبك

      خدها عاخدك

      والشامةِ عالغمزةِ

             وياحلا روحْ

                  نحنا للعشقْ

                        أحلى روحْ