* * *
غريبْ عن اسمي عن صباح الخير ال ما رجعْ غريبْ عن قلبي عن اونةِ انرسمت بحبكْ وتقدّستْ بغار وضحكاتْ من لون عيونكْ وكلماتِك الأحلى من ترتيلْ الأحلى من غنيّة عشقْ وهوا . . . غريبْ غريبْ عن وقتي ال صار من بعدكْ كأنّو مََّي مافيها حَياة غريبْ عن لساني ال ماعادْ يعرف درب الهوا ولا طعمة لسانكْ ولا كلّ ميلي بجسمكْ ولا عرق بينضح بعد كل تعب وشهوة لساني ال بيطيبكْ من الهمّ وتقلْ الحياة . . . غريبْ عن رغيفْ الخبز وحبةْ الزيتونْ عن كاسْ الخمرْ عن مشوار ندوّر العالمْ مشّانْ تاسومةِ وبكلةْ شعرْ غريبْ عن ريحة الّورق ال بكتبو قَصايد وكلماتْ سحرْ غريبْ عن مرايتي ال صارْ كلّ ما شفتْ حالي فيها . . . سألتني وَين تركتْ الوجه الحنون وطيبْ القلبْ وَين شامةْ الحسنْ وضحكة الجنةِ وَين تركتْ ال كان عمرها ماتفارقكْ قلبها عاقلبك خدها عاخدك والشامةِ عالغمزةِ وياحلا روحْ نحنا للعشقْ أحلى روحْ
ماسألتْ القلبْ شو غيَّركْ عن حَوشتْي ومين غَير عيني بيعرفْ شهقتكْ ولهفةْ صدركْ الي . . . من لونكْ أخذتْ أحلى نظرة بالعمر نطرتْ نطرتْ كتير عا دربْ مالو لون ولما جيتْ مسحتْ روحي بدمع وحب ومن وقتها لقلبي صار رفيق ريحتو من ريحتي ولونو بلوني متل الفلَ وأحلى من الورد . . . وحياة آهتنا سوا وحياة كل ياسمينة قطفناها عن درابزين دروبك ياشام وكل دمعة عين وحزن خطوة خطوة بروحاتنا وجيَّاتنا وايدنا أصابعها بترقص فرح وحوشات ونظرات مابيشبع منها الحلى وحياة آهتنا سوا كتبتيني .. كلمةِ .. كلمةِ . . . كتبتيني كلمة كلمة من وقت اللي عَينيكي شهقتْ وقالتْ شوهالشب وشو هالحلا ياريتني ماسمعتْ الحكي ولالفَّيت ايدك بايدي لو بعرف انو بعد ما غمرتني حوشات وبوسات رَح تتركني متل كذبةِ وماتسألْ شوبني ومابعرف اذا نسيت اسمي يلي كان أحلى اسم عالسانك وبَداني همسك يدغدغني عشقْ ودلع ياريتْ لما ببردات المشاوير حطيتي ايدك وخبيتها بايدي متل شي قطفة حبق سحبت ايدي وقلت لا يابنت أنا أبعد عنك من السما رَح نبقى قرايبْ متل أخوةِ لك لعبي بكلشي إلا عقلاتي أنا ياريت ماسهرنا بعتمات النجمات ولاسرقت هالبوسات اللي بعدهن عشفافي متل الصلا حفروا بقلبي حبك شهوة وأسى ياريت ضلَيتي زغيري ووعدكْ من وقتْ الشّقا حلفتي وماعمرك احدعشر سني رَح آخدك وأتجوزك ياصبي وعاايدي أنا بربيك لا الي . . . والله كبرتي ومتل الحلم ادَّلعت عليَ وسويتيني لعيونكْ وألبكْ أحلى ايام من الزعل والضحك وآهات بيناتنا وسهرات عا مخدّة ايدي وحضن دافي وماعاد شربتي الميّ ولا شايات الصبح الا من تمّي أنا و شفايفك تشتألي وماتخلّي ايدي إلا عابطة هالصدر اللي ما بينام الا ببوساتي أنا . . . كتبتيني كلمةِ .. كلمةِ وياريتْ ما خربشتي عا كتبي ودفاتر ايامي لو بتعرفي شو كتبتي رسايل وأصايص ورق هون وهون تركتيها عا تختي وطاولتي همسات مكتوبة بدمع وجرّة ألم من ايد عم ترجف من كتر الهوى وشو جمَّعتي وراق شجر وازهار من كل لون وعطر وصرتِ تغاري من المسا كيف بيجي قبلك الي ادّلعت عليِّ وتركتينيي ليال بطولا ماعليِّ الهدم قال بتحبي لوني وريحتي ومع كل شهقة بتاخدي هالقلب بايدكْ متل عسل مابيشبع منو هالدّلع ويا ويل الدّني اذا بها الليل فقتي شي لحظة وما لقيتيني لافك عا صدري انا قال بتحبيني وعا غفلة عين رحَتي تركتيني عادرب مابعرف ان كان من هالدّني عمّ العب بربطات شعرك اللي نسيتيها تحت مخدّتي حمرا . . صفرا . . بلونك . . وأنا عمّ اسأل شو صار بالوعد والعهد يا سما * * *
<<الصفحة الرئيسية
